أول مرة حلمت بيكى
بقلم الشاعر / مجدى زيادة
************************
أول مرة حلمت بيكى
فاكرها لسه زى الليلادى
حسيت ليلتها من عنيكى
إن انتى خايفة من بعادى
وفى ليلتها حلمت اني
لسه راجع من السفر
بس البعاد كان غصب عنى
والفراق قسمة وقدر
بصيت لقيتك واقفة جنبى
بتسألى نفس السؤال
هو انت فاكر لسه حبي
ولا حبك شيء محال
رديت عليكى وقلت عمرى
ماهنسى لحظة من هواكى
دانتى شمسى وانتى قمرى
وعمرى كله يروح فداكى
فى الحلم برضو كنت خايف
لاتهل علينا الشمس بدرى
أو يضيع همس الشفايف
أو يموت الشوق في صدرى
كل دا وانا كنت بحلم
والحلم عمره ما كان حقيقة
وان قلبى عمره ما سلم
وان دى احلام بريئة
بس لما صحيت لاقيتنى
مشتاق أشوف عنيك ياغالى
واقول فى نفسى لو يوم سابتنى
هاحتار كتير واسهر ليالى
ومن يوميها وانت عندى
كل حاجة حلوة ليا
وكل لحظة راح تعدى
من غير عنيك تصعب عليا
مجدى زيادة.
ليست هناك تعليقات:
إرسال تعليق