جنون الذات ياقلبى
بقلم الشاعر جنرال /مصطفى سبتة
*******************************
مارسى جنونك ع القلب
وارسمى مداين ذات
اردمى في بحر الندم
وتجاوزى الازمات
اروي الزتون ع الشجر
يطرح سلام للبشر
ويصلح اللي انكسر
ويجمع الاخوات
مارسى جنونك ع القلب
وابدأى ماهيش صعبة
الصعب ممكن تفهميه
لو تفهمى اللعبة
اصنعى حياة م العدم
لو الحياة تعبة
طول ما انتى عينك للسما
وف قلبك الكعبة
هاتلمى شمل اللي ابتعد
وتقربى المسافات
في الرمل لسة الاثر
والدمع في المناديل
والدم يحكي العبر
للدنيا جيل ورا جيل
حكاية لو تنحكي
هاترصها مواويل
ارسمى قلوب للأمل
وابعتيها في المراسيل
ترجمى آيات ملحمة
قرأن مع الانجيل
احكي التاريخ للزمن
لكن بدون تضليل
دا الظلم طبعه الهوي
والكفة ليه بتميل
والعدل منه انطوي
والحق طبعه قليل
هيه البداية كدة
والرك ع النهايات
لو وعد بلفور مغنمة
والموعودين عصابات .
والدنيا دي متقسمة ع
الخوجة والبهوات
والارض بتلمهم
والمطحونين ف شتات
والشوطة واللخبطة
بتحدد المسارات
دوامة متظبطة
واخدة الجسد دورات
والنكسة فيك من زمن
م التوهة للمتاهات
يرموك تكون التمن
ويخيروك خيارات
تختار لقبرك وطن
هاتموت في ارض اليمن
ولا تموت في ايلات
من سوريا جابو الكفن
والغسل دم فرات
مهما الشيطان تلعنه
مابتنفع اللعنات
هتلاقي مين تسأله
الدنيا رايحة لفين
مارس جنونك وابتدي
وابدأ مع التمرين
واحد وهب اتعدل
ماتروح شمال ويمين
علم بسن القلم
علي الحر بالافكار
لاتهده يوم زوبعة
ولا يحدفه التيار
لا يكون ف يوم امعة
ولا بونط للاشرار
ويعيش يصون ذمته
وبيحفظ الاسرار
ع الجبهة كون البطل
علي نفسك الأمار
في الشدة تصبح عمر
في الصعب كون مختار
واللي رماك بالليل
رده بالف نهار
بالكلمة ابني الهمم
بالحرف بالهمزات
مارس جنون القلم
تفهم جنون الذات
بقلم مصطفى سبتة
ليست هناك تعليقات:
إرسال تعليق