( كُحْل لعنينا وحِنَّة )
بقلم الشاعر محمد حافظ حافظ
**********************
قصيدة ( كُحْل لعنينا وحِنَّة )
مهداة لـ ( للحبيبة الغالية )
عايز أشوفك كل يوم
كل يوم أنا عايز أشوفك
عايز أحس إنك معايا
وإني مش ممكن أسيبك
***
أنت أحلامي اللي مرت
وإنت أحلامي اللي جايا
ما أنت أنفاسي وعمري
من عنيك نور عنيا
***
طبطبي الدنيا وشيلي
من همومي حبتين
يا عيونا " زينبية "
فيها من سيدنا " الحسين "
***
لما تخديني في حضنك
تنكسف كل الهموم
بلقى قلبي ويا قلبك
يرقصوا بين النجوم
***
فاكره يا أما لما كنا
لما كنا صغيرين
قلبنا أخضر وعنَّا
زي غصن الياسمين
كان معانا الكون بيكبر
كان معانا الكون بيكبر
وأنت كف حنان بتمسح
كل أحزان السنين
***
قالوا شمس وقالوا جنَّةْ
قالوا فرض وقالوا سُنةْ
قلت رحمة من إلهي
كُحل لعنينا وحِنَّةْ
***
النهارده قالوا عيدك
والهدايا كتير تجيلك
بس أنا بينهم بنادي
كل يوم بيمُر عيدك
***
ليست هناك تعليقات:
إرسال تعليق