( حبيتها كده)
بقلم الشاعر / اشرف البنا
***************************
مصر الإنسان .. وف كل زمان
أهل وعيلة .. جنة أوطان
حبيتها كده
قصر الحكايات. .. بير الحواديت
والسر ف قلبه .. ف ركن غويط
ماهي مصر كده
رب السموات ... أنشأها كده
أوجدها كده ... وحفظها كده
تسمع من فوق المادنة آذان
بيرتل حي على الرحمن
وكنيسة تزغرط بالأجراس
بتنادي محبة للإنسان
وقت الصلوات يجمعنا ندا
ماهي مصر كده
حبيتها كده
رب السموات .. أنشأها كده
اوجدها كده .. وحفظها كده
الصبح بندفن ابن شهيد
والضهر نغني أغاني العيد
ف العصر تاخدنا ايدينا لبعض
ف المغرب زفة عريسنا جديد
نفرح ونجيب .. اجمل منشدة
ماهي مصر كده
حبيتها كده
رب السموات .. أنشأها كده
اوجدها كده .. وحفظها كده
الكورة أجوان .. شعبنا غاوي
مقسوم أهلاوي .. زملكاوي
لكن ساعة مصر ماتلعب
أحضاننا بتتلاقي غناوي
ونرج الملعب صوت وصدى
ماهي مصر كده
حبيتها كده
رب السموات .. أنشأها كده
اوجدها كده .. وحفظها كده
مصر بقفشاتها ... وضحكتها
بيهون الصعب ف دمعتها
بصعيدي وفلاح وبحيري
الكل يدوب ف محبتها
ملحمة بتزلزل اي عدا
ماهي مصر كده
حبيتها كده
رب السموات .. أنشأها كده
اوجدها كده .. وحفظها كده
يا هوا المجاريح .. وسحاب صافي
حالة بتعنش .. قلبي الدافى
ألوان الدنيا .. ماتسواشي
تمشية على النيل وعوافي
بنشم نسيمها .. عبير ورضا
ماهي مصر كده
حبيتها كده
رب السموات .. أنشأها كده
اوجدها كده .. وحفظها كده
ليست هناك تعليقات:
إرسال تعليق